Historia del mathematica

Le historia del mathematica tracta del origine del decopertas in mathematica e le methodos mathematic e notation del passato. Ante le epocha moderne e le diffusion mundial de cognoscimento, exemplos scripte de nove progressos mathematic deveniva cognoscite solmente in pauc locos. Ab 3000 a.C., le statos mesopotamic de Sumer, Akkad e Assyria, sequite a curta distantia per le antique Egypto e le stato levantin de Ebla, comenciava a usar arithmetica, algebra e geometria pro fini de taxation, commercio, negotiation e anque pro studiar le patterns in le natura, le campo de astronomia e pro registrar le tempore e formular calendarios. Le textos mathematic le plus antique disponibile es de Mesopotamia e Egypto - Plimpton 322 (babilonic, c. 2000 - 1900 a.C.),[2] le Papyrus Mathematic Rhind (egyptian, c. 1800 a.C.)[3] e le Papyrus Mathematic Moscow (egyptian, c. 1890 a.C.). Omnes iste textos mentiona le denominates "tripletes pythagorean", assi que, per inferentia, le theorema pythagorean pare esser le progresso mathematic le plus antique e extensive post le arithmetica e geometria basic. Le studio del mathematica como un "disciplina demonstrative" comenciava in le seculo VI a.C. con le pythagoreanos, qui introduceva le termino "mathematica" ex le ancian greco μάθημα (mathema), que significa "subjecto de instruction".[4] Le mathematica greco affinava multo le methodos (specialmente con le introduction del rationamento deductive e le rigor mathematic in le demonstrationes) e expandeva le themas del mathematica.[5] Ben que illes quasi non faceva contributiones al mathematica theoritic, le ancian romanos usava mathematica applicate in le mensuration, construction, construction mechanica, contabilitate, creation de calendarios lunar e solar, e anque in le artes e artisaniato. Le mathematica chinese faceva contributiones initial, includente un systema de valor positional e le prime uso de numeros negative.[6][7] Le systema de numeration hindu-arabe e le regulationes pro le uso de su operationes, in uso in tote le mundo hodie, evolveva durante le prime millennio post Christo in India e esseva transmittite al mundo occidental per le mathematica islamic a travese del labor de Muḥammad ibn Mūsā al-Khwārizmī.[8][9] Le mathematica islamic, a su vice, disveloppava e expandeva le mathematica cognoscite a iste civilisationes.[10] Contemporanemente ma independente de iste traditiones, habeva le mathematica disveloppate per le civilisation Maya de Mexico e America Central, ubi le concepto de zero habeva un simbolo standard in le numeration Maya. Multe textos greco e arabic sur mathematica esseva traducite al latino a partir del seculo XII, lo que resultava in ulterior disveloppamento del mathematica in le Europa medieval. Ab tempores antique usque le Medievo, periodos de decoperta mathematic sovente esseva sequite per seculos de stagnation.[11] A partir del Renaissance Italian in le seculo XV, nove progressos mathematic, interagente con nove decopertas scientific, esseva facite a un passo crescente que continua usque al die nostre. Isto include le travalio innovante de Isaac Newton e Gottfried Wilhelm Leibniz in le disveloppamento del calculo infinitesimal durante le curso del seculo XVII.